ساڵێك پڕ له‌ پیت و به‌ره‌كه‌ت
ساڵێك پڕ له‌ پیت و به‌ره‌كه‌ت

  نه‌ له‌ وتارێكی وا كورت و نه‌ له‌ باسێكی ئه‌ده‌بی دا شوێنی گرینگی كه‌سایه‌تێكی وه‌كو مامۆستا هێمن نایه‌ته‌ ئاراوه‌؛ به‌ڵام ده‌مه‌وێ ساڵی كۆتایی ژیانی ئه‌و زاته‌ به‌رزه‌ بده‌مه‌ به‌ر تیشكی ئاماژه‌یه‌ك.  هه‌مومان ده‌زانین پیره‌ پیاوانی وڵاتی ئێمه‌ ساڵه‌كانی ئاخر و ئۆخری ژیانیان كه نه‌فت و كه‌له‌لا ده‌بن ،ده‌بێ خزمه‌تیان كه‌ین و بۆیان بپاڕێینه‌وه‌ و […]

 

نه‌ له‌ وتارێكی وا كورت و نه‌ له‌ باسێكی ئه‌ده‌بی دا شوێنی گرینگی كه‌سایه‌تێكی وه‌كو مامۆستا هێمن نایه‌ته‌ ئاراوه‌؛ به‌ڵام ده‌مه‌وێ ساڵی كۆتایی ژیانی ئه‌و زاته‌ به‌رزه‌ بده‌مه‌ به‌ر تیشكی ئاماژه‌یه‌ك.

 هه‌مومان ده‌زانین پیره‌ پیاوانی وڵاتی ئێمه‌ ساڵه‌كانی ئاخر و ئۆخری ژیانیان كه نه‌فت و كه‌له‌لا ده‌بن ،ده‌بێ خزمه‌تیان كه‌ین و بۆیان بپاڕێینه‌وه‌ و بڵێین خودا روحمیان پێ بكا و زه‌لیل نه‌بن و… به‌ واتایه‌كی ساكارتر یانی ده‌ردی پیری هێنده‌ نه‌چێژن وخودا پاكیان كاته‌وه‌ بمرن.

دوایین ساڵی ته‌مه‌نی

سه‌یر له‌وه‌ دایه‌ دوایین ساڵی ته‌مه‌نی مامۆستا یه‌كێك له‌و ساڵانه‌ بو كه‌ ئێستاش و نازانم تا كوێی داهاتوهه‌ر له‌ به‌رهه‌می به‌هره‌مه‌ندین، ئه‌و بنه‌وانه‌ هه‌ر لێی هه‌ڵده‌قوڵێ و پیت و به‌ره‌كه‌تی نابڕێته‌وه‌. شك له‌وه‌ دا نیه‌ بواردنی سه‌بكی رۆمانتیك بۆ ریالیزم له‌ شێعر و ئه‌ده‌بیاتی كوردی دا،به‌ره‌و پێش بردنی قۆناغێكی چیرۆكی كوردی، رێ خۆش كردنی رێبازێكی شێعری نوێی كوردی، هێنانی وشه‌ی خۆماڵی و تێكه‌ڵ به‌ ژیانی گوند و وه‌رزێڕی و تۆمار كردنی هه‌زاران وشه‌ی كه‌ ئه‌وده‌م له‌ مه‌ترسی له‌ناو چون دابون، چه‌سپاندنی زۆر شێوازی نوێخوازی وه‌كو گرینگی دان به‌ ده‌وری ژن له‌ كۆمه‌ڵ دا ،پێشڕه‌و بون له‌ هه‌ل و مه‌رجی رامیاری، كۆمه‌ڵایه‌تی، فه‌رهه‌نگی و… راگوێستنیان بارستایی و قورسایی زیاتری له‌سه‌ر شانانی مامۆستا هێمن بووه جا هه‌موی ئه‌وانه‌ له‌وێ دا راگرین و دیزه به‌ ده‌رخۆنه‌ی كه‌ین؛

بێینه‌ سه‌ر كاكڵی باسه‌كه‌مان 

له‌سه‌ره‌تای شه‌سته‌كانی هه‌تاوی له‌ كوردستانی رۆژهه‌ڵات گه‌ڕانی گه‌ردون له‌گه‌ڵ نیازی مه نه‌بو هیوامان له‌گه‌ڵ رۆژی هومێد نالێك بو سه‌رمای حه‌په‌سانێكی ترسێنه‌ر وڵاتی داگرتبو ئاوردان هه‌ر خۆڵه‌مێشی لێ به‌جێ مابو، ده‌ریای بێ به‌ستێن له‌ پۆنگاوی قوڵی خۆی دا راوه‌ستابو، ده‌رو گیرابو، له‌ ورینگه‌ی كوردی وێژی دور كه‌وتبوینه‌وه‌ ،مه‌ودای كوردی نوسین و هه‌ستی بزوتنه‌وه‌ گێره‌ی له‌ سه‌ر سه‌ری ده‌گه‌ڕا؛ له‌م ده‌وره‌ حه‌سته‌م و باقه‌ پسێنی خۆیانی كوردی دا عومری هه‌ستیاران ده‌هاڕدرا و هێندێك گێره‌یان له‌ هه‌ولێر ده‌گه‌ڕا، وه‌ك ده‌وری به‌تاڵی فه‌لسه‌فه‌ی لێ هاتبو، گرێ گرێپوچكه‌ درابو، لێژ به‌ره‌و هه‌وراز بو، هه‌وراز نادیار.

یه‌ك ناگا شنه‌ی سروه‌ی مامۆستا له‌ بڵاوگه‌ی سه‌لاحه‌ددین هه‌ڵی كرد و مژی ره‌واند له‌ پارده‌ی هه‌وراز گه‌یشتینه ئاسۆی رونی ده‌ره‌تان ،ئه‌وه‌ی له‌ بیری نه‌ته‌وه‌كه‌ی دا چۆقاو و پروكابوگه‌شاوه‌ وده‌رسی كه‌وتن ئه‌زمونی پسپۆڕانه‌ی پێ دابون كه‌ له‌ زانكۆی سه‌لاحه‌ددینی مامۆستا هێمن دا ئاهێكیان هاته‌وه‌ به‌ر و پشویان دا و بوژانه‌وه‌ و سه‌ریان هه‌ڵداوه‌ و تێهه‌ڵچونه‌وه‌ به‌ڵام به‌ به‌رگ و بارێكی دیكه‌وه‌ هه‌روه‌ك زاتێكی ره‌گه‌كانی گیرابێ و خوێن تێیدا نه‌یه‌و نه‌چێ له‌ پڕێك ره‌گ به‌ ره‌گی بكرێته‌وه‌ له‌ هه‌مو لایه‌كه‌وه‌ لافاوی نامه‌ی شادی، شێعر، ئه‌فسانه‌ و هه‌مو بابه‌تێكی ئه‌ده‌بی ده‌وڵه‌مه‌ندی زاره‌كی كه‌ وه‌ك گه‌نجینه‌ له‌ قوڵك و ته‌ندوری وێرانه‌ی ده‌رێنی له‌ زانكۆی مامۆستا بو به‌ مه‌ڵۆ و ته‌رمه‌ك و تایه‌ كه وته سه‌ریه‌ك. جا وه‌ره‌ و شانی لێ داخه‌ و بیخه‌ چوارچێوه‌ی وه‌رزنامه‌یه‌كی ساوا كه‌ سه‌دان گرفت و بیانو و داهاتویه‌كی ته‌ماوی بۆ ده‌نوێنن تا له‌ ئاسۆگێك، زه‌ردوماهێك، شیوێك به‌ ته‌ماڵی هه‌ڵێنن و قرخه‌ی لێ ببڕن.

نه‌ورۆزانه‌ی ساڵی 63

به‌ڵام ئه‌و تیره‌ نیشانه‌ی پێكا بو به‌ پێچه‌وانه‌ی زۆر جاران كه‌ عه‌بدولعه‌زیزی داسنی له‌ سه‌یده‌وانی كوردی دابو ئه‌م جاره‌یان تیری ئاوات نیشانه‌ی دڵخوازی ئه‌نگاوتوه و نه‌ورۆزانه‌ی ساڵی 63ش كۆشێك گوڵی گه‌شی به‌شی من و تۆ و ئه‌م و ئه‌وی پێ بو زۆر زو به‌هاروی كورد ئه‌وه‌نیایه‌كی لێ روا كه‌ زو كه‌وته‌ قه‌ف و گوڵ و ده‌غڵ و داهات و تێشوی پێدا دابه‌شین.

له‌ ماوه‌یه‌كی كه‌م خایه‌ن دا نه‌ك كوردی رۆژهه‌ڵات به‌ڵكه‌ له‌ هه‌نده‌رانیش زانكۆی مامۆستا یان كرده‌ روگه‌ و خوێندنه‌وه‌ی سروه و نوسینی بابه‌ت بۆ سروه بو به‌ شه‌وچه‌ره‌ی هه‌مو ماڵیك و مایه‌ی ده‌سگه‌رمی و سه‌رقاڵی زۆربه‌ی ماڵان ؛تا وای لێ هات كوردی نه‌زانین و نه‌نوسین وه‌ك عه‌یب دو عارێك ده‌هاته‌ به‌ر چاو ته‌نانه‌ت مامۆستایه‌كی پسپۆڕ ئه‌گه‌ر كوردی نه‌زانیبا ره‌نگه ئه‌وه‌ی بۆی كه‌سری شانێك بایه‌.

سه‌ره‌ڕای هه‌موی ئه‌وانه‌ زانكۆی سه‌لاحه‌ددینی مامۆستا ده‌ستی دا چاپ و بڵاوكردنه‌وه‌ی زنجیره‌ كتێبێك كه‌ چاپ و ده‌ست كه‌وتنیان بۆ ئێمه‌ مانان به‌ خه‌ونیش له‌ خه‌یاڵ دا نه‌ده‌گونجا چونكه ئه‌مه‌ یه‌كه‌م جار بو له‌و به‌شه‌ی كوردستان به‌ ڕاشكاوی و به‌ فه‌رمی بلاڤگه‌یه‌ك یه‌ك دا به‌ دو ئه‌و كتێبانه‌ له‌ چاپ دا كه‌ كوردی خوێنه‌ تامه‌زرۆكان ده‌یان ساڵ بو به‌و مه‌گیرانیه‌ سوێیان ده‌هاته‌وه‌ دوا به‌دوای ئه‌وه‌ش  نوسه‌رانی كوردی كه‌ له‌و زانكۆیه‌ دا زو خۆیان گرته‌وه‌ یه‌كه‌م جار و به‌ره‌ به‌ره‌ به‌رهه‌میان له‌ چاپ ده‌درا و لێره‌ دا ئه‌و بواره‌شمان بوارد كه‌ ده‌توانین بنوسین و چاپ كه‌ین و…

ساڵێك كار كردن

ساڵێك به‌ رێك خستن و به‌ پلان كار كردن ئه‌وه‌ی سه‌لماند كه په‌ل هاویشتن و ره‌گاژۆی   نه‌مامی دروست چه‌قاو گه‌لێك ساڵان به‌هره‌وه‌ری هه‌یه‌ كه‌ ره‌نگه‌ بێ كۆتایی بێ. ئه‌مه‌ ته‌نیا سێ بابه‌تی ساڵێك تێكۆشانی بێ وچانی پیری كارامه‌ی كوردستان بو كه‌ زۆر بابه‌ت و ورده‌ بابه‌تی دیكه‌ی لێ كه‌وته‌وه‌ دیاره‌ ئه‌و هه‌مۆ له‌ وتارێك دا له‌ ته‌ره‌ نادرێ .   

به‌ داخه‌وه‌ ئه‌و ‌ به‌رزه‌ فڕه  دوای ساڵێك و شتێك گه‌وی به‌ین و به‌قای بوارد وشاباڵی      به‌ره‌وهه‌رمان لێدا هه‌مومانی له‌ گه‌شكه‌ی گریان دا نوقمی به‌حری خوێی وخۆێنی فرمێسك كرد. به‌ڵام وه‌كازێكی دا ده‌ست هه‌موان تاماون بوێرنه‌سره‌وبن وئه‌و نه‌مامانه‌ی به شه‌تڵی كردن تا ئێستا به‌خته‌وه‌رانه‌ هه‌زاران وه‌چه‌یان لێ كه‌وتۆته‌وه‌ كه‌ كارامه‌وكاركرده‌ن وهه‌موشیان خۆیان به‌ قوتابی و به‌رمنه‌تی هه‌تا هه‌تای ئه‌و ده‌زانن.

 

  • نویسنده : نسیم آزمند